ABŞ-nin 10 illik dövlət istiqrazlarının gəlirliliyi 5,02 faizə qalxıb. Bloomberg agentliyinin məlumatına görə, bu, 2007-ci ilin iyulundan bəri ən yüksək göstəricidir.
Analitiklər artımı bir neçə amillə izah edirlər. Bab-əl-Məndəb boğazında gərginlik və Yaxın Şərqdəki hərbi münaqişələr fonunda neft və qaz qiymətləri bahalaşıb, bu isə qlobal inflyasiya risklərini artırıb. İnvestorlar bu riskə qarşı daha yüksək gəlirlilik tələb edirlər. Bundan əlavə, texnologiya şirkətlərinin süni intellekt layihələrini maliyyələşdirmək üçün iri həcmdə korporativ istiqraz buraxması da borc bazarına təzyiq göstərir.
Bazarın diqqəti Federal Ehtiyat Sisteminin sentyabrın 16-da açıqlanacaq faiz qərarına yönəlib. Ekspertlərin fikrincə, FES dərəcələri dəyişməz saxlasa, istiqraz gəlirliliyi yüksəlməyə davam edə bilər.
Reform.az şərhi: ABŞ istiqrazlarının gəlirliliyi bütün dünyada borc xərclərinin əsas göstəricisidir. Onun yüksəlməsi inkişaf etməkdə olan ölkələr üçün kapitalın bahalaşması, dolların güclənməsi və xarici borclanmanın çətinləşməsi deməkdir. Xarici dövlət borcu aşağı olan Azərbaycan üçün birbaşa risk məhduddur, lakin idxal olunan inflyasiya və valyuta bazarlarına təsir baxımından bu tendensiyanı izləmək vacibdir.
Mənbə: Bloomberg, Oxu.az
